Vo 0 uf 100 - mir sinn baraat!

von mivob

S Piccolo vo yygnäschdete Spinne befreie,

d Drummle zwääg mache und gege Holzwürm yypraye.

Bim Lachemeier früschi Farb go hoole

und d Zoggeli bassend greadiiv aamoole

 

D Paugge neu spanne, s Sousaphon poliere,

d Larve entstaube und Räppli sortiere.

D Blaggedde montiere, dr Fasnachtsblaan studiere

- alles erledigt? – no über s Comité moniere!

 

S spitzig Ryssblei duet sy Ryssblei spitze,

s Röösli duet mit sym Pflääger uff em Rollator probesitze,

dr Heiri kunnt bi sym ‘beat’ im Stall ins schwitze

und au d Gundula kunnt usem Röntgezimmer z flitze.

 

Zaggig hets jetz miesse vorwärts goo

d Bolydigg het ys fascht wider im Saich lo stoo

und denn doch no entschiide: ‘MARSCH’

…sunscht hätte die Aggdyyve gsait: lägg mr doch am A…Füüdle!

 

Freue mir ys aso, as es wider vorwärts goot,

as ändlig wider e Fasnacht vor dr Düüre stoot,

as d Stroosse sich fülle mit Musig und anarchistischem Lääbe

und mir wider Fasnachtskultur dien pflääge!

 

S Team vo dr Basler Fasnachts-Wält wünscht ganz vyyl Spass uff dr Gass!

Zurück