Glyy schloots Vieri...
von Tobias Scheuring
RRRÄDÄBÄNG! ...s goot wider loos,
s drummle und pfyffe uff dr Strooss,
dr Wegger het zem uffstoo gschällt
und dr Hund het vier Mool bällt.
Ab ins Goschdyym und uff d Gass,
hoffe, syg diss Joor emol nit nass,
warte bis es Vieri schloot
und dr Morgestraich aafoot.
Uuseluege us dr Larve
warte wie all Joor – syg e Brave!
MORGESTRAICH, VORWÄRTS, MARSCH,
jetz goots loos – beweg Dy Ar...Füüdle.
Ab dur d Gasse, ruesse, pfyffe,
dr Voordraab baant sich durch die Pfyffe
wo mit Blitzliecht uff dr Strooss
Helge schiesse, s isch famoos.
Drnoo e Määlsubbe im Schnabel gniesse,
dr Schnabel uff, e Wysse drzue giesse.
Noonemool uuse go schnubbere an dr Fasnachtsluft
und spaichere, was er härgit, dä heerlig Duft!
Drei Daag gniesse, dräume, Liedli bloose,
gnaisse, plaudere, stuune, loose,
schränze, drummle, schreegi Döön
...bis mir wider haime göön...
Duusig Yydrügg sammle in däne Stunde,
nur an die hailyge Verainszyte bunde,
anarchistisch die schönscht Stadt erlääbe
und drnoo in dieffi Dräum entschwääbe.
Wyter dräume s ganz lang Joor
seensüchdig schiile uf die verstaubte Waggishoor
Bis dr Wegger wider schällt
und dr Hund au vier Mool bällt.
copyright: mvb
S Team vo dr Basler Fasnachts-Wält wünscht Euch e Fasnacht voller Dräum und Seensücht, voller Gnuss und überwältygende Momänt!
Und us aggduellem Aaloss:
Corona, Corona, Corona, Corona
Corona, Corona, Corona, Corona
Corona, Corona, Corona, Corona
mir gänn drotzdäm drei Daag dr Doon aa!