E Jammer...!

von mivob

E Jammer…!

Es isch e Jammer, die letschte zwai Joor für d Katz
mir sinn dehaime bliibe – uff dr Gass kai Rabatz!
D Larven im Käller, s Goschdyym im Kaschde
kai Kääswajie, kai Määlsubbe – fasnachtsmässig am faschte.

 

S Sousaphon verstaubt, dr Majoorestogg  vrscholle
d Waggisdääfeli? …e groosse glääbryge Bolle.
D Drummle isch zem Abstelldischli mutiert
Mutiert? Um Mutazioone hätte mir ys am liebschte foutiert!

 

Aber die letschte zwai Joor sinn mir fremdbestimmt
uff em Canapé glääge und uff Ghoorsaam trimmt
d Regierig het ys gsait, wie mir ys solle benää
und statt e Larve e Masgge als Acessoire nää
E Masgge statt Larve – das ka doch nit syy
do grauts jeedem Bebbi und me waiss ganz glyy
das zügt vo grausamem Fasnachtsunverständnis
das mues sich ändere – zugunschte vo freudyge Vrhältnis
es mues wider anderscht syy in Basel – wenigschdens drei Dääg
wild, farbig und voller Freud - und Fasnachtspflääg!

 

Hoffe mir, as s nägscht Joor wieder Freud mitbringt
und jeede Fasnächtler wider Zyt uff dr Gass verbringt
as mir ys könne voorfreue uff die schööne Stunde
mit Fründe uff dr Gass und in de Käller unde!


Litho: Copyright by Tobias Scheuring (ts@ringring.ch)
Täggscht: Copyright by Basler Fasnachts Welt

Zurück