Glyy, ganz glyy...
von mivob
Wenn s am Morge Vieri schloot
und in Basel s Liecht abgoot,
denn stöön mir ändlig wieder yy
und laufe ruessend über e Rhy.
D Läddärne schyyne, d Piccolo schrille,
am Märtblatz grilliert dr Bell früschi Grille,
Brotwürscht sinn hüt nümm modärn:
Mir gänn ys z Basel gärn mondään.
D Stadt daucht yy in e sanfti, waarmi Sphääre
…unseri Seele dien sich drvoo ernääre,
Drei Daag zämme syy, drei Daag gniesse
und zwüschyyne e Zwaierli hinderegiesse.
Dr ‘Morgestraich - vorwärts – Marsch’ wird gspiilt,
wäärend dr Laddärnedrääger scho uff d Määlsubbe schiilt:
Glyy isch Zyt für an Stammdisch, gmietlig zämmesitze
Wärend e erschte Waggis vorusse duet ummeflitze.
Ändlig, ändlig isch s wider so wyt:
Si isch wider doo, die lang erseent Fasnachtszyt
Mir wünsche Euch vyyli schööni Stunde
Bim gässle, intrigiere und Cliquekäller erkunde.
S Team vo dr Basler Fasnachts-Wält.
Bsuech d Fasnachts-Usstellig im Museum der Kulturen am Münschterblatz.